कांजुर डम्पिंग बंद करण्यासाठी विक्रोळीत आंदोलन; सह्यांची मोहिम व एक दिवसाचे लाक्षणिक उपोषण

मुंबई, दि. १६ (प्रतिनिधी) – कांजुरमार्ग येथील डम्पिंग ग्राऊड बंद करण्याचा आदेश मुंबई उच्च न्यायालयाने दिला आहे. या आदेशाचे पालन करण्यात यावे म्हणुन प्रशासनावर दबाव आणण्यासाठी विक्रोळी रेल्वे स्थानकाबाहेर एक दिवसाचे साखळी उपोषण करण्यात आले. यावेळी स्वाक्षरी मोहिम देखील राबविण्यात आली. शिवसेनेचे विक्रोळी विधानसभेचे आमदार सुनील राऊत तसेच  युवासेना कार्यकारणी सदस्य राजोल संजय पाटील यांनी आंदोलनस्थळी भेट देऊन सह्यांच्या मोहिमेत भाग घेतला.

तीन महिन्यात कांजुर येथील डम्पिंग ग्राऊड खाली करण्याचे आदेश अलिकडेच मुंबई उच्च न्यायालयाने दिले होते. मात्र त्या आदेशावर तात्काळ कार्यवाही होताना दिसत नाही, म्हणुन विक्रोळीतील स्थानिक नागरिकांनी प्रसासनाविरोधात आवाज उठविण्यासाठी विक्रोळी स्थानकाबाहेर सह्यांची मोहिम घेऊन एक दिवसाचे लाक्षणिक उपोषण केले. या आंदोलनाला स्थानिक नागरिकांनी चांगला प्रतिसाद दिला असून रेल्वेने प्रवास करणा-या हजारो प्रवाशांनी सह्या करुन या आंदोलनाला पाठिंबा दिला. कांजुरमार्ग तसेच देवनार डम्पिंग ग्राऊंड बंद करण्यासाठी खासदार संजय दिना पाटील यांनी वारंवार आवाज उठविला होता. त्यासाठी संसदेतही त्यांनी हा मुद्दा प्रामुख्याने मांडला होता. त्यांच्या प्रयत्नाला यश आले असून देवनार डम्पिंग मधला कचरा उचलण्यासाठी आता पालिकेने सुमारे २ हजार तीनशे कोटी रुपये मंजुर केले असून लवकरच कंत्राटदाराची नियुक्ती करण्यात येणार आहे.